«Երիտասարդ դասախոս» խորագրի այս հարցազրույցը ՀՊՏՀ բանկային գործի և ապահովագրության ամբիոնի դասախոս Անահիտ Ավետիսյանի հետ է։
Անահիտ Ավետիսյանը ֆինանսական ոլորտի մասնագետ է։ Գիտական հետաքրքրությունների շրջանակն ընդգրկում է ֆինանսներն ու բանկային գործը։
Դասախոսական 10 տարվա փորձ ունի։ ՀՊՏՀ-ում դասավանդում է դրամավարկային քաղաքականություն, բանկային գործառնություններ։
Անահիտ Ավետիսյանի հետ զրուցել ենք մասնագիտության ընտրության, բանկային ոլորտի, գենդերային հավասարության հարցերի շուրջ։
– Սիրո՞ւմ եք Ձեր մասնագիտությունը և այն աշխատանքը, որը կատարում եք ամեն օր: Արդյո՞ք «սիրելը» շատ կարևոր է պրոֆեսիոնալիզմի և կարիերայի աճի տեսանկյունից:
– Թե՛ մասնագիտությունս, թե՛ աշխատանքս շատ եմ սիրում: Այո´, «սիրելը» շատ կարևոր է, իսկ մանկավարժությունը ոչ միայն աշխատանք է, այլ նախևառաջ՝ կոչում: Համոզված եմ, որ ցանկացած գործունեության մեջ հաջողության հասնելու նախապայմանը «սիրելն» է: Մասնագիտական կողմնորոշման հարցում երիտասարդներին կոչ եմ անում առաջնորդվել հենց այս սկզբունքով: Ինքս էլ ժամանակին ընտրել եմ ՀՊՏՀ-ն՝ հետևելով սրտիս ու մտքիս թելադրանքին:
– Բանկային ոլորտ մտնող երիտասարդ մասնագետի համար մարդկային և մասնագիտական ի՞նչ որակներ են անհրաժեշտ:
– Ես չէի ցանկանա որևէ ոլորտ առանձնացնել, քանի որ, իմ խորին համոզմամբ, ցանկացած ոլորտում էլ կարևորվում են մարդկային բարձր որակները՝ ազնվությունը, աշխատասիրությունը, պարտաճանաչությունը, պատասխանատվության զգացումը, բարեկրթությունը և, իհարկե, պրոֆեսիոնալիզմն ու ստեղծարարությունը:
– Ինչպիսի՞ն պետք է լինի երիտասարդ դասախոսը, որ կարողանա վայելել ուսանողի հարգանքն ու վստահությունը:
– Դասախոսը պետք է հարգի և սիրի իր ուսանողներին, պետք է առնվազն փորձի ավագ ընկեր լինել. այս պարագայում, կարծում եմ, կվայելի նրա և՛ հարգանքը, և՛ վստահությունը:
– Մեկ տասնամյակ բուհում դասավանդելու ընթացքում նկատե՞լ եք, թե «Բանկային գործ» մասնագիտության գծով սովորողների սեռային ինչպիսի համամասնություն կա (տղանե՞րն են շատ, թե՞ աղջիկները):
– Եթե նախկինում գուցե և կար տղաների թվի գերակայություն, ապա ուրախությամբ պիտի նշեմ, որ այսօր տղաների և աղջիկների թիվը գրեթե հավասար է:
– Ձեր կարծիքով՝ կա՞ այս ոլորտում գենդերային հավասարության խնդիր (օրինակ՝ կա՞ն կին բանկի կառավարիչներ):
– Գենդերային հավասարության խնդիր չեմ տեսնում. կանայք այսօր լիարժեքորեն զբաղեցնում են երկրի համար կարևորագույն պաշտոններ, մասնակցում են երկրի տնտեսական, քաղաքական, մշակութային կյանքին ու կրում են սոցիալական պատասխանատվության իրենց բաժինը: Այո´, ներկայումս բանկերում նույնպես պատասխանատու պաշտոններում ունենք հաջողած կին աշխատակիցներ և կին կառավարիչներ:
–Տնտեսագիտական մայր համալսարանը օրեր անց կթողարկի դիպլոմավորված մասնագետների մի նոր սերունդ: Բանկային ոլորտը որքանո՞վ կշահի մասնագիտական համալրման տեսանկյունից:
–Կարող եմ վստահորեն ասել՝ մեր բուհը լիարժեքորեն տալիս է մասնագիտական տեսական գիտելիք, իսկ բուհի և ամբիոնի գործադրած ջանքերի շնորհիվ ուսանողներն ուսումնառության տարիներին մասնակցում են նաև փորձառությունների ու բանկերի հետ համատեղ իրականացվող ծրագրերի, որոնց շնորհիվ ձեռք են բերում նաև գործնական հմտություններ: Պատահական չէ, որ բանկերի մեծ մասում աշխատում են հենց մեր շրջանավարտները:
Հուսով եմ՝ ՀՊՏՀ շրջանավարտների նոր սերնդի թողարկմամբ բանկային ոլորտին սպասվում է որակյալ համալրում: Օգտվելով առիթից՝ բարի երթ ու անխոչընդոտ ճանապարհ եմ մաղթում բոլոր շրջանավարտներին:
– Եվ Ձեզ ավելի լավ ճանաչելու համար՝ մի քանի բլից-հարց.
– Լավագույն ֆիլմը, որ երբևէ դիտել եք։
– Չեմ որակի որպես լավագույն, բայց կնշեմ «Աղախինը» (The Help):
– Գիրք, որը վերընթերցելու պահանջ եք զգացել:
– Շատ են, այս պահին կնշեմ Վարդգես Պետրոսյանի «Հայկական էսքիզները»։
– Երաժշտությունը Ձեր կյանքում։
– Օրվա ընթացքում երաժշտություն վայելելու շատ ժամանակ չեմ ունենում, բայց երբ հնարավորություն է ընձեռվում, հաճույքով լսում եմ տարբեր ժանրեր:
– Ի՞նչը կարող է Ձեզ ուրախացնել։
– Անգամ ամենափոքր բանը. առհասարակ կարծում եմ, որ մարդն ինքը պիտի փնտրի ու գտնի փոքրիկ ուրախություններ:
– Ի՞նչը կարող է Ձեզ զայրացնել։
– Մարդու վարվելակերպը. այն թե՛ զայրացնում է, թե՛ զարմացնում:
– Ի՞նչն եք ամենից շատ արժևորում մարդկանց մեջ։
– Ազնվությունը:
Լուսանկարները՝ Անահիտ Ավետիսյանի անձնական արխիվից
Զրուցեց Շուշան Շահվերդյանը